事半功倍? 了解SCRUM後既3個得著
與SCRUM既相遇
係一個科技帶領世界走既時代,聽講有一套好有效既工作流程叫”SCRUM”。
最近就睇左一本講解有關SCRUM既書,想分享一下當中既3個得著。
書名為"SCRUM 用一半的時間做兩倍的事 (The Art of Doing Twice the Work in Half the Time)"。
SCRUM = 事半功倍?
到底點解SCRUM工作流程聲稱自己可以做到事半功倍? 我認為主要因為佢其實係多套系統既系統 (System of Systems, SOS)。
如果將佢打散黎睇,其實佢包括唔少方法同原則,包括係短期計劃上用上類似S.M.A.R.T.既目標設定原則、實際執力上著重PDCA(Plan,Do,Check,Act)循環式品質管理、得到新資訊之下運用統計學上既貝氏推論 (Bayesian inference)黎預計及更改預期結果等等……但依部份唔係我想講既野,如果你想了解SCRUM更多,上面提到果本書係唔錯既選擇。
3個得著
雖然SCRUM係一個團隊處理Project既流程工具,但我覺得當中有3個重點放諸四海都好有用。佢地分別係
- 化整為零 (增加動力既前提下)
- 不斷修正
- 自主成就卓越
1.化整為零 (增加動力既前提下)
點先食到一隻大象? 就係要一淡一淡咁食。
— 比爾·荷根
相信好多人都聽過,但有咩工具可以有效做到?
有咩工具係可以切細一個計劃而令到執行計劃既人更有動力行動?
SCRUM入面提出既衝刺(Sprint),正正就係一個可以跟住做既流程。
衝剌(Sprint)
衝刺(Sprint)係SCRUM一個用係大項目(Project)入面既工具,佢係每次抽出一部份可獨立完成既小項目(Item),而係一個相當短既時間入面,完成同展示出成果。
展示成果同埋限時係衝刺既兩大核心,因為展示成果可以令人有唔衰得既面子動力,而限時可以創造出前期令人興奮既3分鐘熱度效果同埋最後既死線戰士(Deadline Fighter)狀態。
只有係可以增加動力既情況下,化整為零先能有效加快完成一個大計劃。所以,衝刺係兩大核心既幫助底下,成為化整為零去完成一個大計劃既好工具。
2. 不斷修正
基本上人類文明既進步都係基於嘗試錯誤(Trail and Error)。
正正係因為不停試,不停錯,不停改,先有今時今日既成果。
就係因為有試過,有錯過,有了解過,人類先會有足夠既資訊去了解咩係正確或者有效既決定。
其中一個SCRUM厲害既地方係佢好重視修正,相信大家都聽過PDCA(Plan,Do,Check,Act)循環式品質管理。Scrum正正就係強調要不停運用依個流程。
只有速速改變、改善,先係永遠不變既不敗定律。
要做到以上幾點,SCRUM提出既方法係邊做邊改,唔好浪費時間設計一個完美目標,要時刻保持彈性。
另外,SCRUM本身作為一個團隊工具講求成員要係跨部門,有齊唔同能力去處理個計劃,咁先可以活用各人優勢,提前減少需要做修正既代價。依一點,係個人處事上都可以靠多吸收各種資訊,由其係唔同背景既成功人士或書籍去做到。
重點都係要做到快速適應,快速改善。正如達爾文係「物種起源」中所提到唔係強,唔係醒,而係高既適應力令你生存。換句話講就係要不斷修正。
“It is not the strongest of the species that survives, nor the most intelligent that survives. It is the one that is most adaptable to change” — Charles Darwin
3.自主成就卓越
SCRUM中提到團隊係可以自主決定要點做,幾時做到,每人都唔應該分高低,只有團隊可以自決計劃既執行時,就令我諗起所有權既重要性(Ownership)。
所有權就係件事係你話事、你決定、你孭飛。當你對件事有所有權既時候,你就會搵到做既原因(Know Why),點做(Know How)就唔再會難到你。因為當係你自發既時候,就唔會有籍口停落黎,你唔會見到一個學行既細路因為行一步跌一跌而唔學行,佢內心既聲音(Inner Voice)唔會同佢講係因為佢能力既問題,佢只會跌到唔跌為止,因為佢就係自發要行到。
正如中文諺語中先講既「有志者,事竟成」或者英文中既「Where there is a will, there is a way.」,自己決定要做既野,自然就會排除萬難做到。
所以,我認為只要係現實環境容許下,即使表面上好似退左步,但做任何事都應該隨心(Follow your heart),因為咁先係長遠追求卓越既最理想方案。
總結&致謝
希望依篇文令你了解到化整為零、不斷修正同自主成就卓越依3點點樣可以增強到行動力、適應力、同排難能力,從而可以幫到你未來高效完成到你既大計劃。
希望以上內容幫助到你!多謝觀看!